موضوع: xXx شرح لعبه xXx Gladiatus الثلاثاء مايو 13, 2008 4:04 am
السلام عليكم و رحمه الله و بركاته
هالموضوع بيكون ان شاء الله شرح كامل و مفصل عن لعبه Gladiatus
بعد التسجيل و كل شي بتدخل اللعبه بتشوف في الصفحه الرئيسيه الصور الموضحه
الصوره الاولى
الترتيب : بيكون على حسب الشرف كل ما زاد الشرف كل ما خذت مرتبه احسن و الشرف يزيد عن طريق الاسطبل او البعثات. القوه مالها خص في الترتيب ف حاسب .. لا تزيد الشرف على حساب قوتك درب لاعبك و في نفس الوقت زيد الشرف
الساحه: هذا ترتيبك في الساحه اذا بغيت تاخذ مركز احسن ادخل الساحه و قاتل حد من الي عندك في ترتيب المقاتلين كل ما فزت على حد انت تاخذ مكانه في الترتيب.. نصيحه قبل لا تقاتل حد اضغط على نكه و شوف قوته و قارنها بقوتك .. جي انت اتوفر على عمرك نقاط من الدم و 15 دقيقه انتظار عشان تقدر اتقاتل مره ثانيه في الساحه.
الشرف: مثل ما ذكرت قبل هذا يتحكم في الترتيب كل ما زاد الشرف خذت مركز احسن عن الي قبل.
المستوى: المستوا يعتمد على نقاط التجارب الي خذتها عن طريق البعثات او العمل في الاسطبل او القتال في الساحه .. ادخل النظره العامه و شوف التجربه كم واصله عندك و كم محتاج عشان اتزيد مستواك .. كل ما كمل الخط الاصفر مال التجربه بيزيد مستواك بمقدار واحد و بترد التجربه للصفر حق المستوى الي بعده.
الذهب: كل شي في هاللعبه يعتمد على الذهب .. بالذهب تقدر تشتري اسلحه و تقدر اتدرب مقاتلك.. تقدر اتزيد الذهب يوم تشتغل في الاسطبل, و يوم اتروح بعثه و اتفوز فيها, و يوم اتقاتل حد و تاخذ ذهبه . الياقوت: نفس باقي الالعاب الاون لاين في العاب تشتري باكج بلاس او اي شي من هذا القبيل و يساعدك في اللعبه و يسهلها عليك. الياقوت تشتريه بفلوس ( مش ذهب اللعبه فلوس صدقيه) تدخل محل المجوهرات و هناك تظغط على اشتري الياقوت الان, بتنفتح لك صفحه ثانيه اتريا عليها شوي بيكون في نصها مربع ابيض اصبر و بتنفتح الصفحه كامله لك.. اشيا بتطلع لك في المربع الابيض اتبع الخطوات هناك و اشتري ياقوت.
الصوره الثانيه
النظره العامه: اضغط عليها و بتفتح لك صفحه فيها معلومات عنك(الشرح موجود في باقي الموضوع عن محتويات الصفحه بالصور). الرسائل: تضغط عليها و من هناك بتدخل على الصندوق الوارد و هالسوالفالصفحه سهله ما يبالها شرح.
النقابه: النقابه اهي نفس التحالف ما تقدر اتكون نقابه او تدخل نقابه الى اذا مستواك كان فوق الـ5 ( على ما اعتقد !!) .. بصراحه انا ما اذكر كيف كان شكل الصفحه قبل لا اسوي نقابه ف السموحه و ما اعرف كيف ادخل نقابه لني ما جربت اذا حد من الاخوان يعرف يقول لنا و بكون شاكر له و اذا حط صور يكون احسن و احسن ( طرار و يتشرط ^______^) الاحصائيات: الله يسلمك هني بتشوف الاعضاء الي اقوا عنك و اضعف عنك و بتعرف منو المركز الاول و هالسوالف .. اذا كان ترتيبك اكثر عن الالف اول ما بتدخل بتفتح لك الصفحه على الي ترتيبهم من 1 لين 50 و اذا كان ترتيبك اقل عن الف بتنفتح الصفحه الي انت موجود فيها يعني لو كان ترتيبك 510 بتنفتح لك الصفحه الي فيها الناس ترتيبهم من 501 لين 550 و بيكون عليك خط اصفر عشان اتعرف عمرك عن باقي اللاعبين. بتحصل في الصفحه فوق مكتوب النقابات.. و مكتوب البحث. اضغط على النقابات و من هناك بيدخلك على الصفحه الي فيه االنقابات و ترتيبهم.. و في البحث تقدر اتدور على شخص من اسمه او على نقابه.
الصوره الثالثه
الاسطبل : هني المكان الي تشتغل فيه عشان اتحصل ذهب (الشرح المفصل للصفحه و الصور بيكونون في هالموضوع كملو قرايه ادري ملل بس شو اسوي مب بايدي) الساحه: هني المكات الي تقاتل فيها مقاتلين ثانين ( نفس الشي الشرح المفصل عقب) الحانه: هني بتحصلون واحد سكير ماله خلق يسوي اي شي يعطيكم مهمات و انتو اتسونها له بالمقابل يعطيكم ذهب و نقاط تجربه و ساعات اشيا ثانيه( على سبيل المثال سلاح او درع او خوذه ....... الخ)
التدريب: هني اتدرب الشسمه .. المقاتل مالك بتحصل مكتوب كلمه قطار(المفروض اتكون تدريب بس الي ترجم كلمه ترين سواها قطار ؟؟؟ الله يسامح المترجم خخخ)
صانع و بائع الاسلحه: هني تشتري اسلحه.. اذا تبا تعرف كيف؟.. بخبرك بس خلك وياي و كمل الموضوع ^_____^.
صانع و بائع الدروع: هني تشتري دروع و خوذ طريقه الشراء نفسها في صانع و بائع الاسلحه خلك وياي و بتعرف كيف الن شاء الله. البضائع العامه: هني اتحصل اكل ( عشان اتزيد الدم) قفازات و جواتي (اكرمكم الله) و بعد شوووو ؟؟ .. هيه مجوهرات ( خواتم و عليقات .. لحد يسالني شو معنا عليقات لني ما ادري ) الخيميائي : هني تشتري مقويات و ترقيات .. المقويات يزيدون لك القوه و او اضرر او الهيبه .. الخ لفتره معينه اما الترقيات مدتها دايمه و يسون نفس الشي.. استخدامهم.. حط الماوس عليها بيطلع لك بابل ( ما ادري شو يتسما بالعربي بس اهو نفس الي في مجله ماجد الفقاعه الي فوق روسهم و مكتوب فيها الي يقولونه.. في هالبابل مكتوب لك اخر شي تحت شو اتسوي عشان تستخدمه) WORNING (حد يجيك لي على الاسبلنج الله يخليكم) تقدر تستخدم ترقيه وحده بس على كل شي... يعني فكر قبل لا تستخدم الترقيه. صاحب محل المجوهرات : هني تشتري ياقوت و اتسوي مقاتلك قائد روماني اذا عندك ياقوت دخلو الصفحه و بتعرفون عن شو قاعد ارمس. ولا اقول لكم بصور الصفحه و بحط لكم الصوره بي خلوكم وياي شوي. خلوكم<< هالكلمه قبيحه ثجيله عاللسان.. ما علينا انكمل ^___________^
المزاد: هني يستوي البكس بس ادعو ربكم طلال خوي و سعيد عبدالغفار ما يحدرون هالمزاد بيطيحون سوقنا السوق: هني الاشيا الموجوده لاعبين ثانين باعوها تقدر انت اتبيع بعد و تشتري من هني بس يبالك اتشوف اسعار السلع مب اتحط مبلغ خيالي من عندك ترا محد بيشتر عقب لا توني اتصيحون لنه محد شرا الي بغيتو اتبيعونه.. انا ما يخصني.
شوفو فوق وين السهم دقو علبى الخريطه بيطلعون لكم هالاشيا الناسك: هذا واحد ما عنده سالفه قاعد فوق يبل بس شغلته يغير اسمك في اللعبه و لا ازيدكم من الشعر بيت ياخذ عنكم بيزات بعد صدق شيبه ما ينقص عليك اسمك و ياخذ منك بيزات عسب اتغيره. الباقين هني يوم السكير مال الحانه يبغي منك شي اتي و اتسويله لي بس الله يعينكم لنه الترجمه موووووووووووووووووووووول اي شي يعني يبالكم اتطرشون الكلام الاستخبارات عسب يفجون شفره الكلام. و الله يعطيهم العافيه شي شباب قاعدي يعيدون ترجمه اللعبه واحد منهم اسمه ابوطلحه على ما اذكر.. يعني اي جمله تفهمونها ادعو لهم لنهم هم معدلينها
الصوره الخامسه :*_*: بعده باقي واااايد شرح
آآآآخخخخ ريلي نقعت المهم هالصفحه تنفتح لكم عقب ما اتقدون على النظره العام 1: هني اتحطون الخوذه 2: هني اتحطون العليقه خخخخخ 3: هني اتحطون الدرع 4: عني اتحطون درع الصدر 5: هني السلاح 6 و7: هني الخواتم 8: هني الجوتي عزكم الله 9 :هني القفاز و الاشيا الي تنلبس عاليد 10: هني الله يسلمكم اتحطون الاشيا الي ما بتستخدمونها هم صفحتين واحد و اثنين في الزاويه الي فوق عاليمين بتحصلو I , II اتدقون عليهم عشان اتحولون بين الصفحتين تحت صورتك ( كلنا توم ما شاء الله نتشابه اذا حد صورته غير يخبرني اخاف انا الوحيد الي قاص على عمري و مخلي هالصوره) المهم تحت صورتك هني اتشوف مستواك و نقاط الحياه ( الدم) و التجربه و هالسوالف حطو الماوس عليهم و بتعرفون كل شي شو فايدته. دقو على تفاصيل اللاعب بتحصلون مور انفورميشن (ثقافه ما شاء الله) و سجل الملاحظات هني تكتبون ملاحظاتكم بما انه انا قلبي اسود انا حاط لسته هناك باسامي الي هجمو علي و فازو يوم بكون اقوا عنهم برد لهم الدين ها ها ها ها (شرير) و خلصنا من هالصوره ظهري قام يعورني
الصوره السادسه
هاع الحين بخبركم كيف تشترون
هني مال الاسلحه بس نفس الشي حق الباقي ( الدروع و البضائع العامه) على اليمين بتحصلون الاسلحه او السلع بشكل عام حط الماوس على السلعه الي تبغي تشتريها و بتعرف كم سعرها و معلومات عنها اذا بغيت تشتريها بس اسحبها من هناك لين المربعات ( نفس الي كانو رقم 10 في الصوره الي قبل) و عقب اذا تبغي تستخدم الي شريتها اسحبه على مكانه تقدر اتسوي هالشي هني او في النظره العامه نفس الشي بس اذا شريتو شي من السوق او المزاد او حصلتو شي من البعثه او السكير عطاكم شي لازم اتسون شي ثاني ...... و نلتقي بكم في الحلقات القادمه ( نفس ما كانو يسون فينا فرسوم الكابتن ماجد في نص السالفه اتخلص الحلقه ) لا صدق يوم بوصل للصوره بخبركم كيف الطريقه ابقووا معنا .. انا تعبت بكمل الباقي في وقت ثاني ان شاء الله ^_^
الرئيسية 
البوابة 
أحدث الصور 
التسجيل 
دخول 
الثلاثاء مايو 13, 2008 4:04 am
